Tarigagay ti General Services Office iti Baguio City a manayunan pay dagiti Material Recovery Facility (MRF) kadagiti babbarangay tapno mapapartak ken mapasayaat ti panakaimaton dagiti basura.
Sigun kenni Eugene Buyucan, dadaulo ti General Services Office, dakkel ti maitultulong dagiti material recovery facilities iti panakaimanehar dagiti basura iti maaw-awagan a ‘Summer Capital of the Philippines.’
Kinunana a sigun iti panagadal, mabalin pay a maipasdek ti dua a material recovery facility kadagiti babbarangay iti siyudad.
Maipalagip a madama met itan ti proseso para iti panakaipasdek ti centralized Material Recover Facility a napunduan iti P30-M sadiay barangay Dontogan, Baguio City.
Daytoy ket iti maysa nga ektarya ti kalawana a lote nga impabulod ti Department of Agriculture (DA).
Kinuna ni Buyucan a naaramiden ti kalsada nga agturong iti nasao a lugar ken maipatungpal metten ti bidding para iti konstruksiyon ti nasao a pasilidad.
Babaen iti nasao a pasilidad, marisut ti pakaseknan dagiti babbarangay nga awanan iti bakante a lote para iti panakaipasdek ti bukodda nga MRF.
Daytoy a pasilidad ket makargaan kadagiti kagawaan a kas iti box feeder nga addaan iti conveyor, bag breaker wenno opener, trommel screen, air separator, manual sorting platform, hydraulic baler machine, belt conveyor, shredder, magnetic separator, bottle wenno glass crusher, used tire shredder, ken textile wenno fabric shredder.
Makargaan met daytoy iti air filtration ken water treatment facility.
Maipalagip nga lima metten a barangay ti addaan iti bukodda nga MRF a pakairamanan ti Gibraltar, Bakakeng Central, Irisan, ken Guisad Central.
Patien ti opisyal a babaen kadagitoy a pasilidad ket nalaklaka a maimanehar ken maksayan ti volume ti basura kasta met ti paggastosan ti siyudad iti panakaibunag dagitoy paturong sadiay Porac, Pampanga wenno sanitary landfill iti dadduma a lugar.
Maipalagip a dumanon iti agarup 300 a tonelada ti basura ti mapatpataud a basura iti Baguio City iti tunggal aldaw, ken dumanon met iti P192 milyon ti nailatang a kaudian a pundo para iti tipping fee iti panakaibunag dagiti basura.//Bombo Alfred Pudsoc
