BAGUIO CITY- Tarigagay ti lokal a gobyerno nga ipaayan iti World Class a pag-ayaman dagiti atleta iti rehiyon Cordillera rason ti pannakaipasdek ti P300-M Sports Building sadiay Baguio Athletic Bowl.
Iti panakaiuman ti Bombo Radyo Baguio ken City Sports Coordinator Gudz Gonzales, inlawlawagna nga iti kanito a maibangon daytoy ket maakomodar dagiti indoor games kas iti billiard, bowling lane, gymnastic, combats ken daduma pay.
Kinunana a paset ti proyekto ti rehabilistasyon dagiti bleachers tapnu makaakomodar iti 6,000 nga audience manipud iti 4,000 a sigud a maak-akomodar daytoy.
Inayonna a manayonan ti kalawa ken kaatidog dagiti swimming pools ken maimuntar ti computerized/electronic system tapnu nalaka a maamoan ti score dagiti atleta.
Namnamaena a babaen iti balligi a pannakapapintas ken pannakaipasdek ti sport building ket mapadur-as ti karera dagiti atleta ken mabalin pay a maidiaya daytoy iti international competitions.
