BAGUIO CITY – Impalubos ti Inter-Agency Task Force on the Management of Emerging Infectious Diseases ti panakaituloy ti panaglukat ti turismo iti siudad ti Baguio iti baet ti panakaipasidong daytoy iti makabulan a General Community Quarantine (GCQ).
Daytoy ket babaen iti panangipasada iti Resolution No. 98 a nangaprobar iti kiddaw ti Baguio City a panakaipalubos ti operasyon dagiti hotels gapu iti adu a bilang dagiti local tourists nga immunan a nagpa-book para iti panagsarungkarda iti siudad iti bulan ti Pebrero.
Inlawlawag ni Tourism Secretary Bernadette Romulo-Puyat nga inyendorsoda iti IATF ti kiddaw ti Baguio gapu iti epektibo a visitor information, registration ken contract tracing system ti siudad ken ti pammatalged iti panakasurot dagiti nainget a pagalagadan tapnu maipasigurado ti kinatalged dagiti turista a sumang-at ditoy siudad.
Nailanad iti naaprobaran a resolusyon a mabalin nga agakomodar dagiti hotels ken dadduma a pagdagasan ditoy siudad para iti leisure purposes ngem nasken a nainget a masurot dagiti health and safety protocols ken contact tracing measures.
Naibilin met ti panangbukel ti Department of Tourism kadagiti pagalagadan para iti panaka-akomodar dagiti turista nga agturong ditoy siudad tapnu agaliwaksay wenno agnegosyo.
