BAGUIO CITY – Maingetanen ti panakasukimat dagiti vans a sumalsalog ken sumangsang-at ditoy siudad ti Baguio.
Iti interview ti Bombo Radyo Baguio, kinuna ni City Administrator Engr. Bonifacio Dela Peña a paset daytoy ti aksionda kadagiti maidandanun kadakuada a panagadu dagiti colorum a van a paglugluganan dagiti apan agal-ala ti travel documents sadiay Athletic Bowl.
Sigun kenkuana, mismo nga empleyadoda ti nakaduktal babaen iti panagpammarang daytoy a kliyente iti panakaidiaya ti P1,500 tapnu makalugan daytoy iti colorum a van.
Dinakamatna a dagus a kinasaritana ni Baguio City Police Office director PCol. Allen Rae Co seknan iti panakairaman dagiti sumalsalog a van kadagiti maipasidong iti nainget nga inspeksion wenno panagsukimat kadagiti border control checkpoints.
Inyunay-unay pay ti City Administrator kadagiti addaan operasyon ti colorum a van a ma-impound ti lugan ken mamulta dagitoy iti kanito a matiliwda nga agbibiahe nga awanan ti kaskenan a pammalubos.
Linawlawaganna met a maawatanna ti tarigagay dagiti maseknan nga agawid iti probinsiada iti ruar ti siudad ngem nasken nga iti legal a wagas ti aramatenda a transportasyon, saan ket a babaen kadagiti colorum a van.
