BAGUIO CITY – Nagballaag ni Councilor Benny Bomogao, sigud a dadaulo ti Baguio City Committtee on Public Utilities, Transportation, and Traffic Legislation kadagiti drivers ken operators ti jeepney iti siudad a saandan nga urayen a masuspindir wenno maminpinsan a maikkat dagiti terminal dagitoy sakbayda nga agtulnog iti nakalanad iti odinansa a masapol nga agurayda ti pasaheros agingga alas dies ti rabii.
Iti interview ti Bombo Radyo kenni Councilor Bomogao, kinunana a mabalin nga ipatungpal ti Traffic Management Division ti nasao nga addang nu agtultuloy latta a saan nga agtulnog dagiti jeepney drivers ken operators iti nasao nga ordinansa.
Innayonna pay a nagasat dagitoy ta saanda a kasapulan ti agbayad ti renta kadagiti staging ken loading areas dagitoy gapu ta libre a maipalpalubos ti panakaaramat daytoy.
Kabayatanna, dinakamat ti konsehal a sumagmamano kadagiti drivers ken operators ket saandan nga agtaltalinaed kadagiti paradaanda agingga alas dies ti rabii gapu ta awan metlaeng ti mauray dagitoy a pasaheros.
Nupay kasta, impetteng ti konsehal a masapol latta nga agtulnog dagitoy iti nakalanad iti nasao nga ordinansa.//Bombo Rob Dominguez
