BAGUIO CITY – Agpanpanawagan ita ni DSWD Secretary Erwin Tulfo kadagiti benepisyaryo ti 4PS nga immawat ti educational assistance idi Sabado, Agosto 20, tapno isublida wenno i-refund-da daytoy.
Inaklon ni Tulfo a nagkurang ti ahensiya a mangipaay ti nalawag ken kompleto a guidelines iti panangiwaras ti educational assistance rason a sumagmamano kadagiti opisina ti nakapasar iti riribuk ken stampede gapu iti panagpila dagiti ado nga estudyante ken nagannak.
Maysa kadagiti panpanunoten ti DSWD ket kissayanda ti binulan nga ayuda dagiti benepisyaryo ti 4Ps nga immawat iti educational assistance ngem sigun kenni Tulfo ket saan a killaat ti panangkissayda.
Immunan nga inlawlawag ti DSWD a saan a kwalipikado dagiti 4Ps beneficiaries iti educational assistance gaputa umaw-awat dagitoy iti ayuda a maaramat metlaeng iti panag-eskwela dagiti annakda.
Nadutukan metten dagiti Local Government Units a mangbigbig iti lugar a pakaipatungpalan ti pay-out kadagiti sumaruno a lima a Sabado tapno maliklikan ti aniaman a riribuk kabayatan ti panakaiwaras ti tulong pinansiyal.
Maaramat metlaeng ti alphabetical list kabayatan ti pay-outs.
