Record-breaking ti nagbalin a performance ti Fearless Highlander a ni Chass Mhaiven Colas iti dua nga events iti Archery Secondary Division (Boys) iti Palarong Pambansa 2025.
Iti panakiuman iti Bombo Radyo kenni Colas a nagturpos iti Junior High School idiay Baguio City National High School, dua dagiti rekord a naartapan wenno nabreak daytoy – ti 50 meters distance ken ti 1440 round.
Nakagun-od ni Colas iti tallo a gold medals manipod kadagiti tallo nga events pakairamanan iti 50 meters distance, 70 meters, ken ti 1440 round.
Sigun kenni Colas,pakabuklan a walo nga events ti nakisalipanna.
Malaksid iti nagun-odna a tallo a gold medals, nakaala metlaeng daytoy iti dua a silver medals partikular kadagiti events a 30meters ken 60meters distance.
Impeksa ti archer ti ragsak ken panagyamanna iti nagbanagan ti panagregget ken panagsanayna iti nasao a tay-ak iti ay-ayam.
Innayon ni Colas nga awan kadakuada iti pamilyana ti nangnamnama a maaratapanna dagiti rekord.
Ti Palarong Pambansa 2025 ti maikatlo nga edisyon a nakisalipan ni Colas.
Tawen 2023 idi damona a makipaset iti daytoy nu sadino, tallo a silver ken maysa a bronze medal iti nagun-odna bayat nga idi 2024 met ti damo a nakagun-odanna iti gold medal iti kapada nga ay-ayam.
Mainaig iti dayta, imbinglay ti archer a nu bakasyon ket innem a daras iti tunggal lawas ti panagsanayna nu sadino, innem agingga walo nga oras iti busbusbusenna tunggal aldaw.
Innayon daytoy a ti Archery ket ibilbilangna kas maysa kadagiti karigatan a mental sport gapu ta malaksid iti nainget a focus ket kasapulan metlaeng nga ag-invest iti oras tapno adalen dagiti napapateg a banag.
Kabayatanna, maysa kadagiti puntirya ita ni Colas ket ti mairaman daytoy iti Philippine Team iti Archery.//Bombo Rob Dominguez
