Imbasura ti Department of Justice (DOJ) ti perjury complaint nga impila ni Senator Jinggoy Estrada kontra kenni sigud a Public Works and Highways Engineer Brice Hernandez.
Naibasura daytoy gapu iti kinakurang ti ebidensia.
Sigun iti DOJ Office of the City Prosecutor iti Quezon City, napaay ni Estrada a nangsuporta iti akusasionna nga adda ti dakes a panggep ni Hernandez.
Daytoy ket mainaig iti panangakosar ni Hernandez ken Sen. Estrada a nakagun-od daytoy iti kickback manipud kadagiti proyekto ti gobierno a flood control projects.
Kabayatanna, kinuna ti DOJ nga iti baet nga adda ti posibilidad a saan a nasayaat ti motibo ni Hernandez, saanna a kayat a sawen nga agul-ulbod ti sigud a Bulacan First District Assistant District Engineer maipapan iti posible a pakainaigan ni Estrada.