Kiniddaw ni Philippine National Police (PNP) Chief Police General Rommel Francisco Marbil ti napigpigsa a suporta ken proteksion para kadagiti pannakabagi ti linteg a nairaman iti war on drugs ni sigud a president Rodrigo Duterte.
Maibasar gamin iti opisial a datos ti Philippine National Police, 1,286 nga opisial manipod Hulio 2016 agingga Hunio 2022 ti naapektaran iti “line of duty”— tallo gasut ken sangapulo ket dua ti pimmusay bayat a siam a gasut pito pulo ket uppat ti nadangran.
Sigun iti nasao nga opisial, dagiti opisial ti nasao nga ahensia ket tinungpalda dagiti responsibilidadda a nabuyugan ti dedikasion ken masansan a sinangoda dagiti peggad tapno maipasigurado ti kinatalged ti publiko.
Kaaduan pay kadagitoy ti nangibtur saan laeng a pisikal a pannakadangran nudiket nasarakanda pay dagiti bukodda a bagi a nairaman kadagiti legal ken administratibo a karit.
Kinuna ni Marbil a dua gasut sangapulo ket uppat nga opisial ti simmango iti 352 a kaso a kriminal bayat iti agdama a panawen.
Patien ni Marbil a numan pay naipasigurado kadagitoy ti suporta, kaaduan kadagiti opisial ti sumangsango iti “consequences” nga inaramidda.
