BAGUIO CITY – Saludo dagiti ospital sadiay Estados Unidos ti Amerika kadagiti Filipino-Americans ken kadagiti Pilipino nga agserserbi a medical frontliners iti laban kontra iti COVID-19 sadiay.
Iti report iti Bombo Radyo Baguio ni Bombo International Correspondent Jun Villanueva manipud Los Angeles, California, naamuan a maap-apresiar ita ti sakripisyo dagiti nars ken doktor manipud Pilipinas nga agtatrabaho sadiay.
Kinunana a nagsanoden dagiti dadduma a puli nga agtatrabaho kadagiti ospital gapu iti buteng dagitoy a maakaranda iti COVID-19 isut gapuna a dagiti Fil-Am a medical frontliners ti maipaspasungalngal kadagiti pagagasan.
Dinakamatna nga imbingay dagiti Pinoy a medical frontliners sadiay Amerika nga agtatrabahon dagitoy para iti serbisyo publiko, ken saan a para iti sweldo dagitoy.
Tarigagay dagitoy a makaispal iti adu a COVID patient tapnu adu ti makalasat iti nasao a sakit isut gapuna nga agtultuloy ti panangitedda iti serbisyoda iti nagduduma a pagagasan sadiay Amerika.
Kabayatanna, suportado met dagiti Fil-Am communities dagiti kakailyana frontliners sadiay Amerika.
Kinuna ni Villanueva nga adda dagiti grupo dagiti Pinoy sadiay nga aglut-luto kadagiti Pinoy foods ken it-itedda kadagiti kailyan a frontliners ken dagiti kakadwa dagitoy a nars ken doktor.
Iti agdama, agtultuloy ti panagngato ti kaso ti COVID-19 sadiay Amerika a dumanon iti nasurok 587,000 a nakayatan ti agarup 24,000 nga indibidual.
