BAGUIO CITY – Agtultuloy ti nainget a panakaipatungpal ti Plastic ken Styrofoam Free Ordinance iti Baguio City Public Market.
Sigun kenni Daryll Kim Longid, dadaulo ti Public Order and Safety Division, adda ladta dagiti matiltiliwanda a pwesto nga addaan ti single-use plastic kan sando bag iti baet a naipaulog ti ordinansa a mangipawpawil iti panakaaramat daytoy.
Kinunana a suksukimatenda dagiti Talipapa malaksid kadagiti stalls ti siudad babaen iti panakitinnulong ti Business and Licencing Office ken Market Treasury Office.
Malaksid iti dayta, ipatpatungpalda ti panakisarita kadagiti vendors ken buyers maipapan iti panaglako ken panagaramat kadagiti altertibo kas iti eco bags ken plastic containers.
Agtultuloy met ti panangipaay iti nasao nga opisina ti libre nga eco bag ken containers para kadagiti market goers.
Innayona a posible a manayonan pay dagiti matiliwanda iti daytoy nga ordinansa nangruna nu maileppas ti pannakapalawa ti sakop daytoy gapu ta manayonan pay dagiti klase ti plastik a maipawil.
