BAGUIO CITY – Nabayagen a mapaplano ti panakakissay ti bilang dagiti barangay ditoy Baguio City nangruna dagiti barangay a ti popolasyonda ket saan a dimmanon iti 5,000.
Iti interview ti Bombo Radyo Baguio kenni Barangay Affairs Office Assistant Executive Secretary Benjie Macadangdang, inlawlawagna nga iti linteg ket rumbeng laeng ti panagtipon dagiti barangay nga addaan bassit a popolasyon kas maysa a barangay.
Kinunana a babaen iti daytoy ket dumakkel ti revenue share ken manayunan ti honorarium dagiti barangay officials kadagitoy.
Dinakamatna a posible a magudwa ti Barangay Irisan a kadakkelan a barangay ditoy siudad iti sidong ti nasao a ganwat.
Inlawlawagna met a saan nga agbalin a tubeng ti panagtipon dagiti barangay iti epektibo a panakaidaulo ti baro a barangay gaputa nakadepende daytoy iti kinaresponsable ti agbalin a kapitan.
Nakasagana met ni Baguio City Congressman Mark Go a mangsuportar iti nasao a plano babaen iti panangipaayna iti pondo.
Puntirya ti lokal a gobyerno ti Baguio a malpas ti panakaipatungpal ti plebisito para iti panagtitipon dagiti maseknan a babbarangay sakbay a dumanon ti 2022.
Idaluan met ni Baguio City Mayor Benjamin Magalong ti mabukel a technical woring group para iti nasao nga addang. (-with Bombo Irene Buenaventura)
