BAGUIO CITY – Naituding a makikoordinar ti DSWD-Cordillera iti lokal a gobyerno ti Tuba, Benguet para iti posible a pre-emptive evacuation dagiti residente kadagiti landslide prones areas iti masakupan ti Kennon Road.
Impeksa daytoy ti ahensia iti naangay a taripnong ti Cordillera Regional DRRM Council – Task Force Kennon Road para iti panakatalantan ti kasasaad ti Kennon Road partikular iti kaudian a panagreggaay dagiti bato a nangbangen iti kalsada idi napalabas a weekend.
Sigun met kenni Engineer Ruth Duyo manipud iti DPWH-Cordillera, adda manen ti napasamak a panagreggaay iti paset ti Kennon Road partikular iti deppaar ti Barangay Camp 6 ken Barangay Camp 5 idi napalabas a Biyernes, July 26.
Kinunana a gapu iti daytoy ket temporaryo nga inrikepda ti nalatak a kalsada agingga nga inlukat dagiti pribado a kontraktor para kadagiti nalalag-an a lugan.
Nupay kasta, agtultuloy a mapaspasaran ti panagreggaay dagiti bato iti nasao a disso a mangituntunda iti penggad ken pangta kadagiti residente ken motorista a dumaldalyasat sadiay.
Nangipaulog ti Cordillera Regional DRRM Council iti paka-ammo idi July 27 seknan iti panakairikep ti Kennon Road kadagiti residente ken saan a residente iti masakupan ti nasao a kalsada kagiddan ti agtultuloy a panakawaknit ken panakaisimpa dagiti nargaay a paset ti kalsada, partikular iti Camp 5.
Agtaltalinaed met a nakarikep ti Kennon Road ken saan a mabalbalakadan dagiti motorista iti saanda a panagdalyasat sadiay, partikular kadagiti masansan a pakapaspasamakan ti panagreggaay ti daga ken bato.
