Impanamnama ni senatorial aspirant Paolo Benigno “Bam” Aquino IV iti publiko nga ituloyna ti rinugyanna a programa kas iti libre nga edukasyon para kadagiti kolehiyo kasta metten ti trabaho para kadagitoy apaman a mabotosan manen daytoy kas senador.
Iti panakiuman ti Bombo Radyo kenkuana, dinakamatna a karaman kadagiti agnumar iti libre nga edukasyon dagiti estudyante iti University of the Philippines- Baguio ken ti Benguet State University.
Inaklon ni Bam a naklaat ken naupay daytoy kalpasan a naksayan ti pondo para iti tertiary subsidy a mabalin a makaapektar iti panakaipaay iti libre a tuition fee kadagiti agarop 50,000 nga estudyante iti kolehiyo kadagiti parabubliko a pagadalan.
Iti baet dayta, impanamnama ni Aquino a kitaenna manen ti pondo para iti nasao a programa nu maipaayan iti gundaway nga agtugaw iti senado.
Malaksid iti libre nga edukasyon, maysa metlaeng a programa daytoy ti panakaipaay iti sigurado a trabaho nangruna kadagiti nakagraduar a marigatan nga makastrek iti trabaho.
Innayonna pay a maysa metlaeng a tutukan daytoy ket ti pananglapped iti panagngato ti presyo dagiti gagatangen kas kadagiti basic commodities, nailet a gunay ti trapiko kas iti siudad ti Baguio ken dadduma pay a lugar.
