Binagaan iti Baguio Water District (BWD) ti publiko nga agtipid iti danum bayat a paasideg ti panagrugi iti summer season iti pagilian.
Sigun iti Baguio Water District, ti panagtipid ket mangrugi iti pagtaengan, ken ti bassit a nga inaldaw nga aramid ket mabalin a maaddaan iti nabayag nga epekto iti komunidad.
Insingasing ti nasao nga opisina ti sumagmamano a wagas tapno makatipid iti danum, a kas iti panagaramat iti palanggana iti panangugas iti pinggan, aggidan nga aglaba, panagaramat iti maysa a baso a danum iti panagsipilio, tunawen ti taraon iti chiller imbes nga ikabil iti danum nga agay-ayos, ken panagaramat iti timba ken tabo iti panagdigos imbes a shower.
Iti maysa a mensahe, kinuna ni Mark Victor Pasagoy, information officer iti BWD, napateg nga aramiden a regular nga aramiden dagiti nasao a wagas iti panagtipid iti danum.
Nupay kasta, kinunana nga agtaltalinaed a nasayaat ti suplay iti danum iti siudad.
Malaksid iti Central Business District ken sumagmamano a lugar nga addaan iti tuloy-tuloy a suplay iti danum iti uneg iti duapulo ket uppat nga oras, kaaduan kadagiti paset iti siudad ket umaw-awat iti suplay iti danum iti dua agingga tallo a daras iti maysa nga aldaw babaen iti rasyon.
Agtultuloy met latta ti panagmintinir iti BWD ti nagduduma a pasilidad iti pagkabilan iti danum a kas iti rain catchment iti Sto. Tomas ken iti baro a pasilidad iti uneg iti Busol Watershed.
Sigun kenni Engr. Salvador Royeca, general manager iti BWD, adda ti pakabuklan a 51,270 nga aktibo a koneksion iti danum iti Baguio nga agtataud iti 73 nga underground deep wells wenno bubon, 89 pumping stations, ken uppat nga spring sources, nga addaan iti pakabuklan a 55,802 cubic meters iti danum tunggal aldaw.
