BAGUIO CITY – Agtultuloy paylaeng ti pursuit operations ti militar kontra kadagiti nakarinnupakda a mapapati a kameng ti rebelde a New People’s Army iti sidong ti Komiteng Larangang Gerilya North Abra iti kabambantayan ti Barangay Pacqued, Malibcong, Abra idi kalman.
Iti interview ti Bombo Radyo Baguio, kinuna ni Major Rogelio Dumbrique Jr., Civil Military Operations Officer ti 7th Infantry Division, Philippine Army a nagresulta ti rinnupak iti ipupusay ti maysa a soldado.
Nabigbig ti banuar a soldado a ni 2Lt. Zaldy Lapis Jr. manipud Iloilo City.
Sigun kenni Major Dumbrique Jr., nakaawat dagiti soldado iti serye ti impormasyon manipud kadagiti maseknan ng umili ti Barangay Pacqued seknan iti armado a grupo a regular nga agturturong iti barangayda tapnu ag-rekrut ken agkikil.
Gapu iti daytoy, nagresponde dagiti kameng ti 24th Infantry Battalion ken 72nd Division Reconnaissance Company iti security patrol iti kabambantayan ti nasao a barangay tapnu iberipikar ti report.
Nupay kasta, sadiay a naka-engkwentroda ti agarup nasurok 15 a miyembro ti NPA ken pimmaut ti rinnupak iti dumanon maysa ken kagudua nga oras.
Pinagyamanan met ti militar ti panangited dagiti maseknan nga umili iti impormasyon seknan iti iligal nga aktibidad dagiti rebelde iti barangayda a mangipakpakita a saan a kankanunungan wenno supsuportaran dagiti Abreños ti presensia dagiti komunista a rebelde sadiay Abra.
Impasigurado pay ni Major Dumbrique Jr. ti kaadda dagiti militar a mangbantay ken mangipaay ti seguridad kadagiti umili ti Malibcong, Abra.
