BAGUIO CITY – Maipaspasidong itan iti nainget a quarantine ti Barangay Catacdegan Nuevo sadiay Manabo, Abra.
Daytoy ket kalpasan a nagpositibo iti coronavirus disease ti maysa nga OFW a residente ti nasao a barangay.
Iti interbyu ti Bombo Radyo-Baguio, kinuna ni Governor Maria Jocelyn Bernos a saan a mapalubusan a rumuar dagiti residente iti babbalay dagitoy ken ti lokal a gobierno ti mangipaay iti kasapulan dagiti apektado a residente.
Dinakamat ti gobernador nga adda ti pulis ken soldado nga agbantay tapno naurnos ti pannakayemplementar ti quarantine.
Nainget met laeng a maipatpatungpal ti curfew iti intero a probinsia manipud alas nuebe ti rabii aginggat alas kuatro ti parbangon manipud inton Martes.
Malaksid iti OFW a nagpositibo iti COVID 19, nainget met laeng a mabambantayan ti dua a Persons Under Investigation (PUIs) iti probinsia.
Karaman kadagitoy ti maysa a babai nga agtawen iti 60 manipud Langiden, Abra ken ti maysa a lalaki nga agtawen iti 55 manipud Tangadan, San Quintin, Abra.
