Kumpiyansa ti Republicans a napinpintas ti nagbalin a performance ni sigud a President Donald Trump nu idilig kenni President Joe Biden iti kaleppas a Presidential Debate a naangay idiay Alaska idi kalman, Hunyo 28.
Iti panakiuman ti Bombo Radyo kenni Jun Delgrado Villanueva Jr., Bombo International News Correspondent – USA, nagduduma ti nagbalin a reaksyon dagiti umili maipapan iti kaunaan a presidential debate da Trump ken Biden.
Maibasar iti survey manipud kadagiti nagbuya iti debate, 96% kadagiti Republican Party ti mangibagbaga nga excellent ti performancen ni Trump bayat a 69% kadagiti Democratic party ti mangkitkita a ni President Biden ti nangabak iti nasao a debate.
Sigun kenni Villanueva Jr., makitkita ti Republicans a saanen a kabaelan ni Biden nga agtuloy iti kina-presidente gapu ta saan nga energetic ti panagsungbatna daytoy nu idilig idi tawen 2020.
Innayona pay a manipud kadagiti survey ket bimmaba ti mental ken physical fitness ni Biden.
Kabayatanna, personal attack ti impatungpal ni Trump kontra kenni Biden seknan iti saanna a kabaelanen nga agay-ayam ti golf ken ti maipapan iti anak daytoy.
Iti naipatungpal a presidential debate, 81% kadagiti botante ti nangipeksa nga awan ti epekto ti debate iti pilienda a presidente; 14% ti mangikonkonsidera iti debate; ken 5% a botante ti nangbaliw iti presidente a pilienda gapu iti debate.
Manamnama nga inton Setyembre a dies ket maipatungpal ti maikadua a debate da Trump ken Biden.//Bombo Mera Pacpacan
