Agkidkidaw iti tulong ken agrekreklamo ti maysa nga indibidual kalpasan a maysa a poste ti kuryente a naipatakder iti abay iti balay dagitoy ti nagsikig bayat a dagiti cable wires ket nakauy-oy gapu iti panagsikigna.
Immunan metten a naiuman daytoy iti Bombo Radyo rason a nagturong ti team ken ditoy a naimatangan ti nakasanggir a pine tree iti nasao a poste a mangsarsarapa tapno saan a matumba daytoy.
Iti pannakiuman ti Bombo Radyo kenni Mrs. Saguiban, immunan a nagturong daytoy idi Agosto, idi napalabas a tawen iti opisina ti Benguet Electric Cooperative wenno BENECO tapno iumanna ti nasao a poste ngem saan dagitoy a nagturong iti lugarda tapno kitaen ti nasao a pakaseknan.
Nagsubli manen daytoy iti opisina ti BENECO idi napalabas a bulan ngem kinunana a naipakita kenkuana ti computation no manu ti magastos no maiyakar ti nasao a poste no sadino dumanon daytoy iti P61,000.
Malaksid iti dayta, impeksana nga idi paylaeng bagyo a Kristine a nangrugi a nagsikig ti poste ngem agingga ita ket saan daytoy nga inas-asikaso ti nasao nga ahensya.
Kinunana pay a nagbalin a private lot ti naipatakderan ti poste gaputa ginatang daytoy ti maysa nga attorney ngem ti kamali ti contractor wenno iti nangisampa iti alad ti poste ket pinutedna ti wire wenno cable a mangtingtinggel iti poste rason nga idi nagbagyo ket nagsikig daytoy.
Imbinglay pay ni Mrs. Saguiban, a saan laeng a ti panagsikig ti nasao a poste no diket iti panag-uy-oy dagiti electric ken cable wires, ken dagiti sumagmamano a wires ket naidikket pay kadagiti bubungan ken tawa dagitoy.
Malaksid iti dayta, ket adda pay ti sumagmamano a live wire ti nauk-ukisan.
Kinunana pay a saan laeng a daytoy ti agrekreklamo kadagitoy nu diket uray metlaeng kadagiti kaarubana.
Kabayatanna, padpadasen paylaeng ti Bombo Radyo nga alaen iti komento ti nasao nga ahensya.//Bombo Noveh Organo
