BAGUIO CITY – Maipalpalagip kadagiti constituents ti responsable a panangibellengda kadagiti basura kasaruno ti napasaran a panaglayus gapu iti panakapullat ti drainage canal idiay City Camp Lagoon kagiddan ti panagbayakabak ti tudo idi kalman.
Iti interview ti Bombo Radyo kenni City Administrator Engr. Bonifacio Dela Peña, ti illegal parking ti makitkita a maysa a problema gapu ta saan a makastrek ti heavy equipments a mangdalus kadagiti basura iti canal.
Gapu iti dayta, umap-apela ti opisyal iti umno a garbage disposals saan a kadagiti karayan.
Kasta met nga agbalin a responsable iti panangiparada kadagiti lugan iti siudad.
Impetteng ni Dela Peña a maiparit ti panagparada iti nadakamat a paset ti lugar gapu ta daytoy ket pagdalanan laeng dagiti equipment a mangdalus kadagiti basura.
Kabayatanna, ibalbalanse dagiti maseknan ti panakaaramat iti suplay ti danum manipud iti lakes iti siudad.
Kasaruno daytoy ti mapaspasaran a saan a nasayaat nga angot iti public market nu sadino kasapulan ti flashing.
Nupay kasta, kinuna ni Dela Pena nga ipangpangruna-da ti panagkasapulan dagiti residente iti danum.
Impettengna a maar-aramid ti flashing pakairaman dagiti parke idi umdas ti suplay ti danum.//Bombo Marinel Rodrigo
