BAGUIO CITY – Napintas ti implementasyon ti roadside parking kadagiti napili a kalkalsada iti Central Business District a naipalubos a pagparadaan dagiti motorista.
Iti interview ti Bombo Radyo Baguio kenni PLt.Col. Oliver Panabang, dadaulo ti Traffic Enforcement Unit (TEU) ti Baguio City Police Office (BCPO), kinunana nga idi pay awan ti pagalagadan ket agmalmalem ti panagparada iti lugan dagiti dadduma a motorista kadagiti igid ti kalsada.
Dinakamatna nga ita nga addan ti naipataw a regulatory fees iti roadside parking ket naipaayan dagiti motorista iti patas nga oportunidad a mangaramat kadagiti nasao a kalsada no adda ti transaksionda ditoy siudad.
Inayonna a ti pagalagadan iti panagsingir iti bayad kadagiti agparparada kadagiti napili a kalsada iti Central Business District ket idi pay laeng a naputar sakbay pay ti agdama a pandemya.
Maipalagip nga iti Ordinance 68, series of 2020 ti Baguio ket naipalubos ti panagparada nga addaan bayad kadagiti designated roadside parking spaces iti Session Road, T.M. Kalaw Street, Assumption Road, Harrison Road, Calderon Street, Claudio Street ken Kayang Hilltop Road.
