BAGUIO CITY – Makidkiddaw ti panaka-awat dagiti taxi drivers nga agbibiahe iti lokalidad iti saan nga agtunos a number coding a maiyem-implementar ditoy siudad ti Baguio ken iti La Trinidad, Benguet.
Kasaruno daytoy dagiti reklamo dagiti sumagmamano a taxi drivers a natiliw iti panaglabsing iti number coding ti La Trinidad iti panagturongda sadiay tapnu mangitulod ti pasahero.
Iti panakiuman ti Bombo Radyo Baguio kenni Councilor Benny Bomogao, dadaulo ti Committee on Public Utilities, Transportation and Traffic Legislation iti lokal a konseho ti siudad, kinunana a napaka-amuan metten dagiti taxi drivers ditoy siudad mainaig iti isyu ti nasao a number coding babaen kadagiti pablaak dagitoy iti social media.
Innayonna a nangipatulodda metlaeng ti resolusyon iti lokal a gobierno ti La Trinidad para iti kiddawda a pannakaitunos ti maipatpatungpal a coding scheme ti La Trinidad iti agdama a coding scheme ti Baguio.
Nupay kasta, inaklonna nga awan pay ti sungbat ti La Trinidad LGU iti daytoy ken awan ti maaramidanda no di ti irespeto ti coding scheme ti nasao nga ili.
Innayonna a nawaya latta dagiti taxi drivers nga agturong sadiay La Trinidad la kitdi saanda a lumabas iti national highway manipud Kilometer 3 agingga Kilometer 6 a pakaim-implementaran ti number coding.
Dinakamatna a mabalinda a magna dagiti taxi iti Beckel Road, Ambiong ken Longlong Roadd paturung iti dadduma a lugar sadiay La Trinidad.
Mainaig iti dayta, ginuyuguyna dagiti taxi drivers nga agsuratda met iti lokal a gobierno ti La Trinidad tapnu ipadanunda ti pakaseknanda kadagiti pasahero nga agturung sadiay.
Nupay kasta, impaganetgetna ti panagrespeto latta iti number coding ti munisipyo babaen iti panangsurot iti daytoy.
Innayonna a nakaawat daytoy ti impormasyon a naipaiman ti resolusyonda iti Sangguniang Bayan (SB) ti munisipyo para iti panakaadal daytoy.
Mangnamnama pay ti konsehal nga ikonsidera ti SB ti La Trinidad ti kiddawda para metlang iti pagsayaatan dagiti umili.
VC BOMOGAO 2
