Agbalbalin a maysa kadagiti parikut a sangsangwen ti barangay AZKCO iti siudad ti Baguio dagiti salisi, gang ken pick pocketing.
Iti pannakiuman ti Bombo Radyo kenni Jefferson Cheng barangay kapitan iti AZKCO, kinunana a saan latta a maliklikan nga adu dagiti mabikbiktima iti daytoy iti baet nga adda dagiti kameng ti Public Order Safety, traffic enforcers ken dagiti barangay tanod.
Kinunana a mapaspasaran daytoy nangruna ta asideg iti palengke wenno central business area ti nasao a barangay.
Kadawyan a biktima ket dagiti agnanaed metlaeng iti syudad ngem adda metlaeng dagiti turista mabikbiktima.
Impeksana pay a saan laeng a pick pocketing ken salisi iti maysa a bambantayanda no diket kasta metten dagiti indibidual nga agar-aramat iti peke a kwarta nangruna dagitoy kairuar a baro a kwarta.
Sigun kenkuana kadawyan a biktima kadagitoy nangruna iti panagaramat iti peke a kuarta ket dagiti natataengan nangruna kadagiti agilak-lako iti natnateng ken dadduma pay.
Imbinglayna a nu man pay adda dagiti cctv iti aglawlaw ngem saanda a mabigbig dagiti suspek a nagaramat iti peke a kwarta ken patienda a saan laeng nga agnanaed iti syudad ti agar-aramat iti peke a kwarta no diket pati dagiti turista.
Gapu iti dayta, nagpalagip ti nasao nga opisyal kadagiti amin nga agturturong iti palengke wenno iti central business area nga agridam dagitoy ken kitaenda a nalaing dagiti usarda nangruna dagiti napapateg nga alikamenda kas iti selpon a saanda nga ikabil iti bulsa ti likod ti pantalonda gapu ta nabiit laeng a madukot daytoy.//Bombo Noveh Organo
