BAGUIO CITY – Pagsagsaganaan ti Committee on Social Services ti “Search for Natatanging Pamilya” kas paset ti Family Month a maipatungpal iti bulan ti Setyembre iti agdama a tawen.
Iti interview ti Bombo Radyo kenni Councilor Elmer Datuin, Chairman ti Committee on Social Services, agsapolda ti model family a maipaayan ti plaque of recognition manipud iti lokal a gobyerno ti siudad ken mangibagi iti siudad para iti national competition.
Malaksid iti mass wedding, maipatungpal ti maysa nga event nu sadino maitampok dagiti family program nga ar-aramiden ti nagduduma nga ahensiya ti gobyerno ti siudad iti Malcolm Square ken Session road.
Innayon ni Datuin a padasenda a mangipaayda ti incentive kadagiti sumagmamano a pamilya a makipaset kadagiti sumagmamano nga event ken posible nga adda ti mapili a pamilya manipud iti nagduduma a barangay nga agavail ti libre iti nagduduma a city attractions.
Sigun kenni Datuin, manarimaan ti panagbirokda kadagiti pamilya a makipaset iti nasao a search babaen iti tulong ti nagduduma a Social Service Area Units dagitoy.
Maysa kadagiti criteria a pagbasaran ti opisina ket nu kasano ti panagbalinda kas model family kas iti panangibagon ti nanang ken tatang iti pamilya ken ti impactda iti intero a komunidad.
