Inarestar dagiti otoridad ti maysa a security guard kalpasan a kellaat a kinalbitna ti 12-gauge shotgun nga issued kenkuana iti baet nga awanan daytoy iti umno a rason.
Ti security guard ket agtawen iti 42, naasawaan ken residente iti Bantayan, Lingayen, Pangasinan.
Maibasar iti report, napasamak ti insidente idiay Upper Poblacion Tuba, Benguet nu sadino, maatap nga adda iti impluwensya iti arak ti nasao a security guard idi inaramidna ti panagkalbit iti paltog.
Kalpasan dayta,maatap nga inbati daytoy ti inaramatna a paltog iti guard house sakbay a pimmanaw ken nagturong iti Baguio City.
Apaman nga inreport ti maysa a concerned citizen ti insidente, dagus a nangipatungpal iti hot pursuit operation dagiti kameng iti Tuba Municipal Police Station a nagresulta iti dagus metlaeng a panakakemmeg ti security guard.
Gapu iti dayta, napilaan daytoy iti kaso a panaglabsing iti article 155 iti Revised Penal Code wenno ti alarm and scandal ken panaglabsing iti election gun ban.
Iti baet a nawaya-wayaan ti security guard iti agdama gapu iti saan a panangawat iti associate provincial prosecutor iti Provincial Prosecutor- La Trinidad ti kaso gapu iti kinakurang iti ebidensya, maituloy latta daytoy babaen iti regular filing bayat a maur-uray ti resulta iti laboratory and ballistic report manipud iti Regional Forensic Unit-Cordillera.//Bombo Noveh Organo
