Impetteng ni Senate President Pro Tempore Panfilo “Ping” Lacson a maimbitaranda sigud nga Ako Bicol party-list Representative Zaldy Co ken sigud a House Speaker ken Leyte Representative Martin Romualdez iti sumaruno a panagdengngeg iti Senate blue ribbon committee.
Sigun kenni Lacson ti imbitasyon kadakuada ket mangipakita nga awan ti linglingdan ti panel bayat ti imbestigasyon iti maatap a naanomalyaan a flood control projects.
Kinuna a mangipatulod dagitoy iti invitation letter kenni Co iti address-na, ngem iti kanito a saan nga agparang daytoy ket impettengna a mangipaulog dagitoy iti subpoena ken show-cause order.
Impaganetgetna pay a no ti show-cause order ket saan a satisfactory, i-cite in comtempt daytoy ti committee ken mangipaulogda metlaeng iti warrant of arrest kontra kenkuana.
Kabayatanna, maipatulod metlaeng ti invitation letter para kenni Romualdez babaen kenni House Speaker Faustino “Bojie” Dy III, kas panang-obserbar iti inter-parliamentary courtesy iti nagtengngaan ti kamara ken iti kongreso.
