BAGUIO CITY – Guyguyuguyen ti Department of Social Welfare and Development (DSWD) – Cordillera dagiti senior citizens tapnu agturongda iti opisina ti ahensia wenno kadagiti Municipal Social Welfare and Development Office iti ayan dagitoy a lugar tapnu maamuan no kwalipikadoda iti social pension (SocPen) nga ipapaay ti gobyerno babaen iti DSWD.
Iti panakiyuman ti Bombo Radyo kenni DSWD-Cordillera public information officer Neri Villanueva, kinunana a sagudayen ti Republic Act 9994 wenno ti Expanded Senior Citizens Act of 2010 ti panakaipaay ti P500 a binulan a SocPen kadagiti kwalipikado a senior citizens.
Inyunay-unayna a saan nga amin a senior citizens ket mabalin a makwalipikar iti SocPen gaputa dagiti laeng kwalipikado iti daytoy a programa ket dagiti senior citizens a mapaneknekan a masaksakit, addaan disabilidad, awanan ti maaw-awat a pension manipud iti dadduma nga ahensia ti gobyerno wenno institusyon ken awanan ti permanente a pagtaudan ti kwarta para iti kangrunaan a pagkasapulan.
Dinakamatna nga nga iti pay-out idi napalabas a bulan ti Agosto ket agarup 60,400 a senior citizens iti rehiyon ti nakaawat iti SocPen dagitoy.
Maibasar iti datus ti DSWD-Cordillera, iti entero a rehiyon ket agarup 61,400 a senior citizens ti kwalipikado iti SocPen manipud iti sigud a listaan a naglaon iti nasurok 83,800 a senior citizens kalpasan ti naisayangkat a panagberipikar ken panagdalus iti listaan.
Innayon pay ni Villanueva a manarimaan ita ti panakarepaso ti kaudian a listaan dagiti benipisaryo ti SocPen ditoy rehiyon ken iti kanito nga adda manen dagiti mainayon manipud kadagiti sigud a naikkat ket kiddawenda ti panangipaluspos ti DSWD-Central Office iti pondo para kadagitoy.
