Manamnama a maideklara a state of calamity iti probinsiya ti Benguet.
Sigun kenni Gov Melchor Diclas, dakkel a tulong ti pannakaideklara a state of calamity iti probinsiya tapnu maaramat ti 20% Quick Response Fund (QRF) ken tapnu makapagkiddaw ti probinsya iti tulong manipud iti national government.
Kinuna ti opisyal a dakkel dagiti damages kadagiti national roads nga adda iti masakupan ti probinsya gapu ta apektado amin daytoy gapu iti naglabas a bagyo ken habagat, pakairamanan dagiti provincial roads no sadino halos amin ket na-isolate.
Malaksid iti dayta, adu metlaeng dagiti nadadael iti sektor ti agrikultura.
Kabayatanna, impeksa ni Diclas a maysa kadagiti makitkita a prayoridad dagitoy iti kanito a maideklara ti State of Calamity iti probinsya ket ti kalsada idiay Tabaan Sur, Tuba, Benguet ken idiay Kapangan.
Iti sabali a bangir, agyamyaman met daytoy iti panagbisita ni Department of Public Works and Highways Secretary Vince Dizon iti panagbisita ken pananginspekna iti probinsya tapno kitaenna ti sitwasyon iti probinsya.
Maipalagip a bimmisita ni Secretary Dizon idi kalman idiay Beckel-Lamut Road idiay La Trinidad, Benguet sakbay a nagturong daytoy idiay Tublay, ken Bolo Creek a naimuntaran ti flood control.//via Bombo Noveh Organo