![](https://img.bomboradyo.com/baguio/2021/05/cbstc-modern-jeep-6.jpg)
BAGUIO CITY – Inlawlawag ti Cordillera Basic Sectors Transport Cooperative (CBSTC) no apay a naksayan dagiti drivers dagiti moderno a jeep dagitoy nga agbibiahe iti siudad ti Baguio.
Sigun kenni Rex Bayangan, Secretary General ti nasao a kooperatiba, maysa a kangrunaan a rason ket ti maatap a panagkupit dagiti drivers iti mabirbirukanda iti innaldaw.
Kinunana a maysa pay a rason ti panaglabsing dagiti naikkat a driver iti “no change policy” ti kooperatiba, no sadino, nasken nga apag-isu ti plete nga ited dagiti pasahero ken no adda ti barya dagitoy ket saanen a kasapulan nga isubli ti driverda.
Impettengna a saan laeng a namnamingsan a gundaway ti impaayda a gundaway kadagiti maseknan a driver tapno risoten ti nasao a pakaseknan.
Dinakamatna a nangipatungpal ti kooperatiba iti evaluation kadagiti amin a drivers dagitoy tapno mabigbig dagiti rumbeng nga agtalinaed ken sadiay met a naduktalanda ti maatap a panagkupit dagiti sumagmamano a drivers dagitoy babaen kadagiti video footage kadagiti CCTV cameras.
Innayonna nga agkurkurang ti maisumsumitir a koleksiyon dagiti maseknan a drivers iti innaldaw.
Nagresulta daytoy iti panakaikkat ti 12 a drivers ti CBSTC manipud iti 50 a drivers dagitoy ken ita ket dumanon laengen iti 25 ti nabatbati a drivers ti kooperatiba.
Iti agdama, maar-aramat ti 17 a modern jeeps ti kooperatiba para iti libre a transportasyon dagiti health workers ken Authorized Persons Outside Residence iti sidong ti Service Contracting Program ti gobyerno.