Sumagmamano nga indibidual pakairamanan ti driver ken konduktor ti naipan iti ospital kalpasan ti aksidente a napasamak idiay Bilis, Burgos, La Union pasado alas sais itay malem.
Naibangga ti bus (Scarlette Jade Transport) iti arco wenno sungadan a pastrek iti Bilis, Burgos, La Union.
Nagtaud ti nasao a lugan iti siudad ti Baguio ken paturong koma daytoy idiay Ilocos idi napasamak ti aksidente.
Gapu iti napigsa nga impact, sumagmamano kadagiti pasahero ti naipit pakairamanan ti driver ken ti konduktor.
Maibasar iti inisyal a listaan nga impaay dagiti otoridad, nabigbig ti driver a ni Hernanie Marquez, 44-anyos bayat a ti konduktor ket ni Benjie Heron, 33-anyos.
(Inisyal a listaan dagiti nakalugan iti bus nga impaay dagiti otoridad)
Agarup maysa nga oras sakbay a nairuar ti driver ken ti konduktor manipud iti bus gapu ta naipit dagitoy.
Naitaray dagiti nadangran iti nagduduma nga ospital iti siudad ti Baguio ken probinsiya ti La Union kas iti Baguio General Hospital and Medical Center, Saint Louis University ken La Union Medical Center.
Saan pay a maipaay dagiti otoridad ti kompleto a detalye ti aksidente nangruna ti nagnagan dagiti pasahero a naipan iti ospital agsipud ta manarimaan ti imbestigasyon dagitoy.
Kitkitaen pailaeng dagiti otoridad nu anya pudno a rason ti aksidente ngem sigun kadagiti dadduma a pasahero ket na loose break ti bus.
Iti agdama ket awan met ti inreport dagiti otoridad a pimmusay iti napasamak nga aksidente.
