Mangnamnama ni Victor Cadwising, lead convenor iti naisayangkat a motorcade itay laeng agsapa iti siudad ti Baguio ken munisipyo ti La Trinidad a pinasettan dagiti supporters ni sigud a President Rodrigo Duterte a makaallukoyda pay kadagiti dadduma a supporters tapno makikadua kadakuada.
Daytoy ket tapno kiddawenda ti tulong ti international community a mangisubli kenni sigud a presidente iti pagilian a Pilipinas.
Mamati ni Cadwising nga ado dagiti silent supporters ni Duterte a saan a physically present ngem mangsupsuporta kenkuana.
Imbinglayna a ti insayangkatda nga aktibidad ket maysa a collaborative effort dagiti nagduduma nga indibidual a kayatda a maki-simpatya iti napasamak kenni Duterte ken tapno maiyebkasda ti sentimientoda iti nasao a pasamak.
Impakaamona nga idi kalman laeng a nagtaripnong dagitoy tapno isayangkat ti motorcade.
Ti nasao a motorcade ket nangrugi sadiay Brgy. Lualhati, Baguio City iti pasado alas nuebe iti agsapa ken nagleppas met sadiay Brgy. Betag, La Trinidad iti pasado alas onse ti agsapa.