BAGUIO CITY – Pagyamyamanan ti maysa nga ina manipud Bacolod City ti agtaltalinaed a natalged a kasasaad ti anakna a lalaki a crew iti Diamond Princess cruise ship a nagluganan dagiti adu a pasahero a nakaptan iti coronavirus disease – 2019 wenno covid-19.
Iti interview ti Bombo Radyo Baguio iti nasao nga ina a nagkedked nga agpabigbig, kinunana a nakaro ti panagdanagna idi nadamagna ti panagpositibo iti covid-19 dagiti sumagmamano a pasahero ti nasao a cruise ship.
Nupay kasta, dagus met a napunas ti panagdandanagna kalpasan nga impasigurado ti anakna ti kinatalged daytoy babaen iti video call.
Imbingayna a kabayatan ti Valentines’ Day ket nangipatulod ti anakna iti kwarta a nanggatang ti maysa pay nga anakna iti sabong para kenkuana ken nangilibre kenkuana iti anibersaryo ti panagkasangayna idi kalman tapnu laeng ma-relax ti rikriknana.
Innayonna a nalaus ti panangdayaw ti anakna iti tulong a naawat daytoy manipud iti gobyerno ti Japan no sadino, nakitana dagiti hygiene kits a naawat ti anakna.
Dinakamatna a saan unay nga agis-istorya ti anakna seknan iti kasasaad daytoy sadiay ita gapu met iti kondisyon ti salun-atna kas maysa a high blood.
Iti agdama, agleppasen ti quarantine period ti anakna ken nakalma ti panunotna gaputa ammona a nasayaat ti kasasaad ti anakna ken dagiti katrabahuan daytoy.
Nupay kasta, agtultuloy latta ti panangikararagna iti kinatalged ti anakna ken dagiti kakadwa daytoy manipud iti covid-19.
Naamuan a walo a tawen nga agtatrabaho ti anakna kas crew iti cruise ship a Diamond Princess.
