Awan paylaeng ti sungbat ni Baguio City Mayor Benjamin Magalong iti karit ni House Committee on Public Accounts Chairperson ken Bicol Saro party-list Representative Terry Ridon.
Idi gamin kalman, kinuna ni Ridon a mangiruar ni Magalong iti natibker nga ebidensia seknan iti alegasion nga adda dagiti mammanday-linteg nga umaw-awat ti 30% agingga 40% a kickback manipod kadagiti proyekto ti gobierno, nangruna kadagiti flood control projects.
Sigun kenni Ridon, nadagsen ti akusasion ni Magalong isut gapuna a kayatna a makita kenkuana mismo dagiti ebidensia nga umaw-awatda mismo iti nasao a porsiento.
Kinunana a nabayagen a dakdakamaten ni Magalong dagiti isyu iti publiko isut gapuna a panawenen tapno mapaneknekan daytoy.
Inkari met ni Ridon a mangisayangkat daytoy iti imbestigasion iti komitena seknan iti nasao nga akusasyon.
Dinakamatna pay a nu malpas iti panangbukelda kadagiti komite iti Kamara, mabalin a rugianda ti panagdenggeg iti maudi a paset ti Agosto.
Innayon ni Ridon a saanda nga anusan ti siasinoman iti imbestigasion, legislator man, regional director, district engineer, wenno uray nangato ti ranggona nga opisial ti ahensia.
