Al-allukoyen ni Sablan Mayor Alfredo Dacumos ti publiko a suportaranda dagiti lokal a produkto a pang-agrikultura a tampok iti agdama a selebrasyon ti maika-11 a fruit festival ti munisipyo.
Iti panakiuman kenkuana ti Bombo Radyo, kinunana nga adu dagiti ipagpanpannakkel ti munisipyo nga dekalidad nga agricultural products kas kadagiti prutas a mabalin a gundawayan ti publiko.
Maipalagip a naladaw ti panakairugi ti selebrasyon ti Sablan Fruit Festival idi Agusto gapu iti pangta dagiti naglabas a bagyo ken habagat.
Naituding met nga agleppas daytoy inton Setyembre 4, iti agdama a tawen.
Ti kangrunaan a paset daytoy ket ti float parade inton Martes, ken farmers congress inton Miyerkules.
Sigun kenkuana, panggep ti nasao nga okasyon nga itampok dagiti agricultural products ti Sablan tapno mayam-ammo daytoy iti publiko ken matulongan dagiti mannalon iti panakailako dagitoy.
Madama met ita ti market encounter a pakaiparparangan dagiti nagduduma nga agricultural products iti aglawlaw ti Sablan Municipal Hall.
Dagiti kangrunaan a produkto ti Sablan ket nagduduma a kita ti prutas kas iti pinya, saba, rambutan, ken uray ti durian.
Tampok pay iti aktibidad dagiti mailaklako a natnateng ken agricultural processed wine ken foods.//Bombo Alfred Pudsoc
