Baguio City-Naituding a makitaripnong ti Baguio Tourism Council iti panangidaulo ni Gladys Vergara kadagiti sumangbay ken mangbukbukel iti Fil-Am Chamber of Commerce manipud Colorado Springs, Colorado, USA, intun Oktubre 17 iti agdama a tawen.
Ti taripnong ket agsentro iti mapangpanggep a kolaborasyon ken opurtunidad iti panagdur-as ti Baguio City ken Colorado Springs kadagiti programa pang turismo.
Sigun pay kenni Vergara, ti meeting ket mangipasimudaag iti panagrugi iti ad-adu pay a konsultasyon a maipatungpal kadagiti nagduduma a tourism stakeholders a mangpadur-as pay iti ekonomiya ti suidad.
Innayon na pay a dagiti naikeddeng a taripnong ket parte iti economic ken cultural partnerships ti Baguio City para iti naan-anay a pannakaital-o dagitoy iti entero a lubong.
Immunan a dinakamat ni Baguio City Tourism Officer Aloysius Mapalo, a dagiti sumangbay a US delegation ket panagrugi iti posibilidad a Sister City relationship iti Baguio City ken Colorado Springs.
Naikeddeng met laeng a makitaripnong dagiti sumangbay a bisita kada BTC co chairman Mayor Benjie Magalong ken kadagiti dadduma pay a city officials tapno naan-anay a mapatibker ti relasyon ti suidad ken iti Greenwood Village, Colorado a mabignigbig nga addan iti dakkel a Filipino community.
