BAGUIO CITY-Temporaryo a mailatang ti kagudwa a paset iti kalsada idiay Hilltop, Baguio City Market kas temporaryo a pagpwestuan dagiti vendors a naapektaran iti uram idi March 11, 2023.
Iti panakiyuman iti Bombo Radyo kenni City Administrator Engr. Bonifacio Dela Peña, kinunana nga madama iti panangiplanoda kadwa iti City Building and Architecture Office para iti relocation site a maipaay kadagiti naapektaran nga stall owners.
Nupay kasta, kinunana a 700 agingga 750 a vendors nga aglaklako iti wet goods iti agpwesto iti kagudwa a paset iti kalsada idiay Hilltop Baguio City Market, bayat a temporaryo a planoda nga iyakar iti Burnham Park, Ibaloi Park ken Malcom Square ti pwesto dagiti daduma a vendor.
Innayon pay ti opisyal a madaman iti panangklasipikarda kadagiti klase iti lako dagiti naapektaran nga stall owners tapno maiplano ken maipaay ti temporaryo a relocation site.
Impeksa pay ti opisyal a mangrugida inton Mierkoles a mangisimpa kadagiti relocation site apaman a malpas ti planning ken coordination kadagiti vendors.
Sigun pay kenni Dela Peña, naipaayanda iti pito nga aldaw para iti temporaryo a relocation site dagiti naapektaran a vendor.
Kabayatanna, umap-apela ti opisyal iti publiko kadagiti kayatna iti tumulong gapu ta agkasapulanda iti dua pulo ket lima a crane tapno maakop dagiti debris, mangipabulod iti scaffoldings ken dagiti volunteers nga agdalus iti lokasyon nga imbati ti uram.
Mainaig iti dayta, saan pay a mabalin a kargaan iti pwesto ti Block 3 ken Block 4 gapu ta madama ti assessment nga ipatpatungpal ti City Buildings and Architecture Office – Baguio City ken Bureau of Fire Protection-Baguio tapno maipasigurado ti kinatalged ti lokasyon.
