Impakaammo ni Cecille Agpawa, program manager iti Smoke Free-Transcending Institutions and Communities, Inc. iti Department of Health -Center for Health Development – Cordillera a ti munisipyo ti Tublay, Benguet ti awanan paylaeng iti ordinansa para iti panangsuporta iti no smoking a programa ti Department Of Health.
Sigun kenkuana, daytoy laeng ti nabatbati a munisipyo iti intero a probinsya ti Benguet nga awanan iti nasao nga ordinansa.
Nupay kasta, kinunana nga addan iti maikadua a pannakibasa ti ordinansa iti nasao a munisipyo.
Kinuna ni Agpawa a ti pannakabukel dagiti ordinansa kadagiti nagduduma a Local Government Unit iti probinsya ti Benguet ti maysa nga addang tapno maprebentaran ti panagaramat dagiti umili iti sigarilyo traditional wenno electronic.
Inlawlawagna pay a karaman iti programa ti Department Of Health ti pannakaikkat kadagiti tobacco advertisements.
Inyunay-unayna daytoy a babaen iti Smoke Free Transcending Institutions and Communities Inc., nga ipatpatungpal dagitoy ket ti kanayunan a panagadal tapno masukimatda ti naun-uneg a rason nu apay a paga-ayat dagiti indibidual nangruna dagiti agtutubo ti panagsigarilyo wenno panagvape.
Innayonna a nakapokus ti programa dagitoy kadagiti agtutubo agsipudta dagitoy ti target nga users ti tobacco industry .
Gapu iti dayta, inyunay-unay ti nasao a program manager a saan laeng a dagiti smokers ti maap-apektaran wenno narisgo ti salun-at dagitoy agsipudta mairamraman dagiti indibidual a kasangsango dagitoy.
