BAGUIO CITY – Impanamnama dagiti nagduduma a dadakkel a pribado a kompanya ditoy Baguio ti panangitedda iti lokal a gobyerno ti siudad iti bakuna kontra ti COVID-19.
Sigun kenni Mayor Benjamin Magalong, nasurok 33,000 doses ti COVID-19 vaccines ti inisyal nga inkari dagiti tallo a kompanya para iti Baguio.
Kinunana a posible a manayonan pay ti nasao a kaado ti bakuna ken dagiti kompanya nga agdonar para iti city government.
Innayonna nga adda metlaeng dagiti nababaknang a pamilya a nangkuna a gumatangda ti bakuna para iti panang-isponsorda iti panagbakuna kadagiti napili a nakukurapay nga umili.
Dinakamat ti Contact Tracing Czar a libre dagiti maipaay a bakuna kadagiti umili kas maibasar iti multi-tripartite agreement a pinirmaan ti city government a maipawil ti panakailako dagiti nasao a bakuna.
