BAGUIO CITY- Ipalpalagip manen ti Department of Labor and Employment (DOLE)-Cordillera kadagiti employers a tungpalenda dagiti provisions iti Labor Code tapno saan dagitoy a maireklamo ken maipaayan iti notice of violation.
Sigun kenni DOLE – CAR Assistant Regional Director Atty. Anthony Wooden, nirikus ti ahensia ti 780 a business establishment iti rehion tapno maamoan nu agtultulnogda iti general labor standard kas ti umno a panakaipaay ti minimum wage; contribution, overtime pay; holiday pay ken daduma pay a mandatory compensation dagiti empleyado.
Manipud iti nasao a bilang, tinagiraksana ti 93% a panagtungpal dagiti employers kadagiti general labor standards.
Nupay kasta, inaklonna met ni Atty. Wooden nga adda latta dagiti employers a mangipapaay iti underpayment of wages, non-payment of overtime pay, holiday pay, rest day premium ken night shift differential.
Gapu iti daytoy, impanamnamana nga agmonitor manen ti ahensya nu pormalen nga aprubaran ti National Wages and Productivity Board Commission (NWPBC) ti kiddaw a maipangato iti P50 agingga P60 ti minimum a sweldo dagiti mangmangged iti Cordillera.
