BAGUIO CITY – Impetteng ni Baguio City Mayor Benjamin Magalong a saanna nga abandonaen ti kampanya ken misyon ti contact tracing ti gobyerno iti baet ti panagikkatna kas Contact Tracing Czar ti pagilian.
Iti eksklusibo nga interview ti Bombo Radyo, kinunana a tulonganna latta ti baro a madutukan a mangsukat kenkuana.
Inyunay-unayna a saanna a baybay-an ti contact tracing ti pagilian gaputa adda ti responsibilidadna a mangtulong kadagigti dadduma pay nga agkasapulan ng LGUs kas iti Bontoc, Mountain Province ken La Trinidad, Benguet.
Innayonna nga ita ket saannan nga ikankano dagiti pammabalaw kenkuana gapu iti panagdar-ayna iti kontrobersial a birthday party ti maysa a celebrity a naangay ditoy Baguio.
Kinunana a tutukan ken ipamaysana laengen ti imatangna iti trabahona gaputa saanna a kasapulan dagiti makasinga iti panagaramidna iti responsibilidadna.
Kabayatanna, innayon ni Mayor Magalong a kasaritana pay ni National Task Force against COVID-19 chief implementer ken vaccine czar Secretary Carlito Galvez Jr. seknan iti irrevocable a panagikkatna kas Contact Tracing Czar nangruna ta saan daytoy nga inawat ti Palasyo.
Innayonna pay nga inaklonna nga adda dagiti nagkuranganna iti naisayangkat a birthday party gaputa kas maysa a government official ken miyembro ti National Task Force against COVID-19 ket napaay daytoy a mangisayangkat iti dagus wenno spot correction kadagiti nakita a panaglabsing kadagiti health protocols iti nasao a pasken.
