BAGUIO CITY – Nawaswasen ti memorandum of agreement wenno katulagan iti nagbaetan dagiti tallo a punong barangay ditoy Baguio ken dagiti asosasyon dagiti jeepney drivers ken operators a nangipalubos iti panakaipangato ti plete dagiti residente iti masakupan dagitoy.
Immunan a nabigbig dagiti tallo a barangay a Camp 8, Poliwes ken San Vicente.
Maipalagip a gapu iti katulagan ket nagbalin a P15 ti plete iti regular ken P12 kadagiti senior citizens ken PWDs.
Sigun kenni Poliwes Punong Barangay John Alba, inlawlawag kadakuada ti Land Transportation Franchising and Regulatory Board (LTFRB) a saanda a nasken a makibiang iti panakaipangato ti plete gaputa nasken a masurot ti nailanad iti permit a naited kadagiti parapasahero a jeep.
Nakalanad iti permit a P9 laeng ti minimum a plete a nasken a masingir kadagiti pasahero.
Pinagyamananna met ti kinuna ti LTFRB-Cordillera a saanda a patawan iti multa wenno pannusa ti nagbalin nga aksiyon dagitoy.
Imbinglayna pay a napagnumuanda iti LTFRB-Cordillera a maipaayan dagitoy iti summon iti kanito nga adda manen ti agreklamo seknan iti panakaipangato ti plete kadagiti jeep iti masakupanda.
Gapu iti daytoy, kinuna ni Kapitan Alba a makaammon dagiti pasahero a mangnayon iti plete dagitoy no kayatda a tulongan dagiti drivers.
