Dimmanonen ti Philippine National Police (PNP) iti Commission on Elections (Comelec) a walo laeng ti bilang dagiti validated election-related incidents (ERIs) agingga idi Domingo, imbes a 29 nga impadamag ti poll body.
Sigun kenni PNP spokesperson Police Brigadier General Jean Fajardo, personal a dimmanon ti nasao a banag kenni Commission on Elections Chairman George Garcia.
Kinuna ni Fajardo a nairaman ti Comelec dagiti insidente idi pay Oktubre, wenno bulan sakbay ti cutoff date ti PNP idi bulan ti Enero.
Para iti PNP, karaman kadagiti validated election-related incidents ti tallo iti Bangsamoro Autonomous Region iti Muslim Mindanao (BARMM), dua iti Western Visayas, ken saggaysa iti Ilocos Region, Zamboanga Peninsula, ken Soccsksargen.
Dagiti report ket pakairamanan ti lima nga insidente ti panagpaltog, maysa a “mauling,” maysa a panagaramat kadagiti eksplosibo, ken maysa a kaso ti cyber libel.
Pakabuklan nga uppat a tattao ti napapatay ken uppat a dadduma pay ti nadangran iti insidente, sigun iti PNP.
Maipalagip a kinuna ti Comelec itay kanikadua a pakabuklan a 29 validated election-related incidents ti naireport sipud idi Oktubre idi napalabas a tawen.
Nupay kasta, inlawlawag ni Fajardo a ti validated election-related incidents (ERIs) ket saklawen laeng ti insidente a napasamak bayat ti election period, a nangrugi idi Enero a dose idi napalabas a tawen.
