Manamnama a maipaay ti Voter’s Information Sheets (VIS) kadagiti botante iti rehiyon Cordillera kadagiti sumarsaruno nga aldaw kagiddan ti panakairugi a panakaiwaras daytoy iti pagilian.
Iti panakiuman ti Bombo Radyo kenni Atty. Julius Torres, Regional Director ti Commission on Elections- Cordillera, kinunana a maud-udi a maipaay daytoy iti Rehiyon I wenno ti Ilocos Region kasta met iti Cordillera Admninistrative Region gapu ta maun-una a maipaay kadagiti ad-adayo a lugas kas iti Batanes ken Mindanao.
Sigun kenni Atty. Torres, personal a maideliver daytoy iti botante wenno iti representative daytoy gapu ta adda mapirmaan kas proof of receipt.
Iti panakaiwaras dagiti Voter’s Information Sheets (VIS), makikoordinar ti Commission on Elections-Cordillera kadagiti babbarangay gapu ta dagitoy ti makin-ammo kadagiti residente iti masakupanda.
Iti sabali a bangir, nagleppasen metten ti training dagiti agserbi kas electoral boards bayat a sumaruno ti training dagiti board of canvassers nga isu’t mangconsolidate kadagiti botos manipud kadagiti nagduduma a precinct.
Innayon met ni Atty. Torres a mangipaay ti Police Regional Office-Cordillera iti 180 a personnel sadiay Abra nga agbalin kas standby no kaspangaringan adda ti saan nga agparang kas electoral boards.
Iti naangay met nga emergency meeting sadiay Abra itay napalabas nga indauloan ni Mayor Benjamin Magalong, ditoy a pinagtalantananda no kasano a marisut ti mapaspasamak a pammaltog sadiay kasta met a nagkari dagiti kandidato a saan dagitoy a mangaramid iti kinaranggas bayat ti panakaangay ti elekcyon period.
