Imbutaktak ni Vice President Sara Duterte nga adda ti it-ited kenkuana ti amana a ni sigud a President Rodrigo Duterte a pundo a pambayadna kadagiti abogado a mang-iggem iti impeachment complaint a sangsangoenna iti agdama.
Nupay kasta, kinuna ti bise presidente a saanna nga inawat daytoy agsipud ta nakasaganan ti kampona a mangsango kadagiti impeachment cases a naipila kontra kenkuana.
Sigun pay kenni Sara, idi pailaeng napan a tawen ket nangrugidan nga agsagana kalpasan nga impeksa ni ACT Teachers Party-list Representative France Castro ti posible a pannaka-impeach ti bise presidente.
“Once we saw the continuous attacks against me, we started preparing for the lawyers,” kinuna ni VP Duterte.
Immunan a naipadamag nga adda ti dua nga impeachment complaints kontra kenni Vice Presidente Duterte a naipila iti kongreso ngem saan pay a nakaala iti naan-anay a pirma tapno maipasa iti plenaryo.
Ti maikatlo nga impeachment complaint ket naipadamag a manarimaan ti pannakaisimpana ken saan pay nga opisyal a naipila.
Karaman kadagiti rason dagiti nangipila iti impeachment complaint kontra iti bise presidente ket ti saan nga umno a panang-aramat ti Office of the Vice President ken ti Department of Education iti confidential funds a dumanon iti P612.5 million.
