Kiddawen ti Office of the Ombudsman ti writs of preliminary attachment tapno maikabil dagiti sanikua ni sigud a Senator Ramon “Bong” Revilla Jr. ken kontraktor Sarah Discaya iti sidong ti kustodia ti korte a mangim-imbestigar kadagiti kaso kontra kadakuada.
Mainaig iti dayta, nakaala metten ti Ombudsman iti writ of preliminary attachment manipud iti Sandiganbayan seknan iti nasurok P200 million worth a gatad ti sanikua ni ex-Ako Bicol Party-list Rep. Zaldy Co.
Gapu iti dayta, panggep ti anti-graft body nga aramidenda ti kapada nga addang iti sanikua ni Revilla ken Discaya.
Sigun kenni Ombudsman Jesus Crispin Remulla, kasapulan a ma-freeze dagiti sanikua dagiti nasao nga indibidual tapno adda ti iggem dagitoy.
Maipalagip a ti writ of preliminary attachment ket addang tapno maikabil dagiti sanikua ti akosado iti sidong ti court custody bayat a manarimaan ti panagdengngeg iti kaso.
Panggep daytoy a masigurado nga adda ti assets maala ti gobierno, iti kanito a maabak dagiti akosado iti kaso.
