![](https://img.bomboradyo.com/baguio/2020/08/blended-learning.jpg)
BAGUIO CITY – Puntirya ti Department of Education (DepEd) – Cordillera a mailista ti zero dropout iti agdama nga school year babaen iti agtultuloy a blended a wagas ti panagadal dagiti estudyante.
Gapu iti daytoy, kiniddaw ni DepEd-Cordillera Regional Director Estela Cariño ti konsiderasion ken panangipaay dagiti mannursuro iti gundaway kadagiti estudyanteda agingga iti maudi a kwarter ti agdama nga school year.
Kiniddawna daytoy kalpasan a nakaawat kadagiti impormasion nga adu ita kadagiti estudyante ti saan a mangisumsumitir ti modules-da gapu iti nagduduma a rason.
Kinunana nga ikagkagumaanda nga aksionan dagitoy a pakaseknan ken planoda a sarungkaran dagiti estudyante nga agkasapulan unay ti atension wenno tulong manipud kadagiti mannursuro.
Ikagkagumaan pay dagiti mannursuro nga agaramid ti nagduduma a wagas para iti panagadal dagiti estudyante, pakairamanan ti panagaramat kadagiti electronic gadgets.
Sigun pay kenni Cariño, agtultuloy ti panagbisitada kadagiti pagadalan iti rehion tapno mangipatungpal ti panagadal ken panagsukimat iti sitwasion dagiti mannursuo ken dagiti estudyante.