BAGUIO CITY – Narekober dagiti otoridad ti 20,000 a gramo ti dried marijuana leaves ken stalks nga aggatad iti P2.4-M iti police checkpoint sadiay Talaca, Agbannawag, Tabuk City, Kalinga idi rabii ti Hulyo 23.
Narekober ti marijuana bricks kalpasan a naimpormaran ti dua a pulis a mangimanmando ti checkpoint seknan iti dua a box a naglaon iti mapapati a kontrabando a maibiahe paturong sadiay Bocaue Exit, Bulacan.
Sigun iti report ti pulisya, nagkiddaw iti pammalubos ti driver ti passenger van manipud iti PNP officers iti Talaca Checkpoint tapno apanna alaen ti dua a box ti kape sadiay Agbannawag, Tabuk City nga ibiahe na paturong sadiay Bocaue Exit, Bulacan.
Nupay kasta, idi adda daytoy sadiay Agbannawag, adda ti nangsukon kenkuana a saan pay a nabigbig nga indibidual ken nagturong dagitoy sadiay New Balbalan, Lacnog East, Tabuk City.
Idi nakadanunda da iti nasao a lugar, maatap nga inkabil ti dua a saan pay a nabigbig nga indibidual ti dua a box iti passenger van a nangitunda iti panagduadua ti driver seknan iti nilaon daytoy.
Gapu iti daytoy, impakaamo ti driver kadagiti otoridad ti dua a box a karga-na idi nakasangpet iti police checkpoint.
Ditoyen a narekober ken naduktalan ti dua pulo a marijuana bricks a mapatta patta nga agdagsen iti 20,000 grams ken aggatad iti P2.4-M.
Iti agdama ket dukduktalen paylaeng dagiti otoridad ti agtagikua kadagiti iligal a droga.
Binigbig met ti Kalinga Police ti inaramid ti driver ti passenger van ken inallukoy da dagiti daduma a tumulong iti kampanya ti pulisya kontra iti iligal a droga.
