Im-imbestigaran dagiti maseknan nga otoridad ti motibo ti 16-anyos a suspek a nangbagsol iti 18-anyos a lalaki iti U-shaped overpass iti nagbaetan ti Magsaysay Avenue, Harrison Road ken Abanao Street idi kalman, Oktubre 6.
Nabigbig ti biktima a ni Mark Joshua Reyes, construction worker idiay Canyon Hill, Tiptop, Pacdal, Baguio City ken tubo ti Kaingin, Bongabong, Nueva Ecija bayat a ti suspek ket residente ti Purok 5. Kias, Baguio City.
Maibasar iti inisyal nga imbestigasyon, magmagna ti biktima ken dagiti kakadwana iti nasao nga overpass idi nasabatda ti grupo ti suspek.
Iti saan nga ammo a rason, maatap a binagsol ti menor-de-edad a suspek ti biktima iti adu a daras sakbay a naglibas daytoy.
Timmaray ti kakadwa ti biktima para iti kinatalged dagitoy.
Dagus a naiturong ti biktima iti Baguio General Hospital and Medical Center ngem pimmusay daytoy bayat ti panakaagasna.
Natiliw ti suspek idiay Betag, La Trinidad, Benguet.
