Maallukoy ti publiko nangruna dagiti agtutubo nga agbuya ken mangsuporta iti manamnama a 2024 Summer Kickboxing Championship sadiay Middle Quirino Hill, Baguio City inton Hunyo 14 agingga 16 iti agdama a tawen.
Iti panakiuman ti Bombo Radyo kenni Mike Humiding, oganizer iti 2024 Summer Kickboxing Championship, kinunana a daytoy nga aktibidad ket para kadagiti agtutubo nu sadino open daytoy kadagiti nagduduma a competitors iti pagilian a Pilipinas.
Sigun kenni Humiding, naorganisa daytoy tapno maaddaan ti pisikal nga aktibidad dagiti agtutubo, tapno maamoanda ti disiplina ken sportmaship kasta met a wagas daytoy para iti panangdiskobreda iti talentoda iti kickboxing.
Iti manamnama nga aktibidad, impakaammo ni Humiding nga awan ti problema kadagiti kagawaan gapu ta ipaay daytoy ti Samahan ng Kickboxing ng Pilipinas ken ti siudad ti Baguio.
Kabayatanna, impeksa ti Organizer ti Summer Kickboxing Championship nga agtultuloy ti panagitandudona iti combative sports iti pagilian agsipud ta paset daytoy ti social responsibilityna.
Kinunana a wagasna daytoy tapno maisublina iti pagilian dagiti benepisyo a naawatna iti panawen a daytoy ket maysa met laeng nga atleta.
Iti panangital-o ni Humiding iti combative sports, impeksana a panggepna a makabirok iti “athletes with a heart” wenno atleta a kas ken da Eduardo Folayang, Mark Sangiao ken daduma pay nga Mixed Martial Artits (MMA) nga itan ket mabigbigbig iti intero a lubong.//Bombo Mera Pacpacan
