Dumanon iti 22 a kilo a tubular iti maatap a dried marijuana leaves ti kinumpiskar dagiti otoridad iti naikasa a buy-bust operation idiay Crescencia Village, Baguio City ita laeng nga aldaw.
Ti nasao nga iligal a droga ket agbalor iti mapatta-patta a PhP2.6 million.
Kagiddan dayta, dua a lallaki ti naarestar pakairamanan ti maysa nga agtawen iti 63 a residente iti San Gabriel, La Union, ken ti agtawen iti 47 a manipod met idiay Tublay, Benguet.
Ti operasyon ket impatungpal iti nagtitipon a pwersa dagiti kameng iti Philippine Drug Enforcement Agency Cordillera- Regional Special Enforcement Team, Benguet Police Provincial Office, ken Baguio City Police Office.
Kabayatanna, sumango dagiti suspek iti kaso a panaglabsing iti Republic Act 9165 wenno Comprehensive Dangerous Drugs Act of 2002.//Bombo Noveh Organo
